Igande honetan jokatuko dute norgehiagoka, 11:00etan, Zubietako plazan
Aurten ere Zubieta eta Luzean izango dira aurrez aurre Enrique Abril Errebote Txapelketaren finalean. Igande honetan izango da hitzordua (2018-09-30), 11:00etan hasita, Zubietako plazan:
Irailak 30, igandea, 11:00, Zubieta-plaza
ZUBIETA vs LUZEAN
Euskal Herriko lau talde lehiatu dira edizio honetan: Gipuzkoako Behar Zana (Villabona), Txost (Oiartzun) eta Zubieta (Zubieta); eta Lapurdiko Luzean (Donibane Lohizune). Zubietak lehenengo postuan bukatu du ligaxka, eta Luzean izan da bigarren, biek finalerako txartela lortuz, hala. Hauxe lehendabiziko faseko sailkapena:
- Zubieta, 6 puntu
- Luzean, 5 puntu
- Txost, 4 puntu
- Behar Zana, 3 puntu
Azken hiru urtetako final bera izango da aurtengoa; 2013an ere aurrez aurre izan ziren Luzean eta Zubieta taldeak finalean. Guztietan Luzeanekoek jantzi dute txapela: 2013-14 denboraldian eta 2015-16an 13-5 irabazi zuten lapurtarrek, 2016-17an 13-4 eta iaz 13-7. Denboran atzerago eginda ere neurtu dituzte indarrak donibandarrek eta zubietarrek: 1989an, Zubietakoak izan ziren txapeldun; Yoko Garbi 13-8 gailendu zitzaion Luzeani.
Enrique Abril Errebote Txapelketaren 27 final jokatu ditu Luzeanek (aurtengoarekin, 28.a; 2012tik honako final guztietara sailkatu da), eta berak ditu txapel gehien: 17 (beste 10 aldiz izan da txapeldunorde).
Atzetik ditu Aviron Bayonnais, 14 txapelekin (6 aldiz azpitxapeldun); Kapito Harri, 11rekin (7 aldiz txapeldunorde); Behar Zana eta Noizbat, 4rekin (8 eta 7 aldiz azpitxapeldun, hurrenez hurren); Endaiarrak 2rekin (behin txapeldunorde); eta Zaharrer Segi eta Yoko Garbi, banarekin (lehenak beste behin izan dira azpitxapeldun eta bigarrenak 6 aldiz).
Zubieta taldeak 5 final jokatu ditu (aurtengoarekin 6.a), baina oraindik ez du txapelik jantzi. Igandean dute horretarako beste aukera bat.
Lehiaketa-Federatua-Enrique Abril atalean kontsulta daiteke txapelketaren inguruko informazio guztia.
