30 bat pilotari elkartuko dira, 10:00etatik aurrera, Beotibar pilotalekuan
Benjamin eta alebin kategorietako neska pilotariek eskuzko bigarren topaketan parte hartzeko aukera izango dute, asteburuan. Urri bukaeran izan zuten lehendabiziko hitzordua, Zestoan. Eta igande goizean elkartuko dira berriro, Tolosako Beotibar pilotalekuan.
Talde politta osatu da, gainera, 31 neska pilotarik hartuko baitute parte igandeko topaketan: benjamin kategoriako 13 eta alebin kategoriako 18.
Hainbat klubetakoak dira: Abantzu (Zestoa), Adospilota, Aloña Mendi (Oñati), Azkoitia, Behar Zana (Amasa-Villabona), Izurun (Donostia), Kuku (Anoeta), Gure Txeru (Getaria), Hondarribia, Ilunpe (Azpeitia), Intxurre (Alegia), Oiarpe (Oiartzun), Pagazpe (Usurbil), Tolosa, Txulobi (Aduna), Zarautz, Ziotza (Zizurkil) eta Zumaia.
10:00etan hasiko dira saioak: 10:00etatik 11:15era benjaminak ariko dira, eta 11:30etik 13:00etara alebinen txanda izango da.
Aurreko topaketen ildotik joango da igandekoa ere: jolasak, dinamikak, partidatxoak… egingo dituzte.
Pilota goxoak erabiliko dituzte, eta federazioak jarriko ditu.
Eta ez dago zuriz jantzita joan beharrik.
Ondo pasa!
