Azken fasera sailkatu den Gipuzkoako talde bakarra da, eta Kanboarrak taldearen aurka jokatu beharko du finalerdia, urriaren 10ean, Villabonan; beste finalerdian Luzean eta Zaharrer Segi izango dira aurrez aurre, larunbat honetan bertan, Zubietan
58. Enrique Abril Errebote Txapelketako finalerdietara sailkatzea lortu du Villabonako Behar Zana taldeak. Azken fasera sailkatu den Gipuzkoako talde bakarra da, Zubietak eta Txostek aurten ez baitute lortu txapelketan aurrera egitea. Honela gelditu da, hain zuzen ere, ligaxkako sailkapena:
A MULTZOA
1. Behar Zana (Villabona, Gipuzkoa), 4 puntu
2. Zaharrer Segi (Baigorri, Nafarroa Beherea), 3 puntu
3. Zubieta (Zubieta, Gipuzkoa), 2 puntu
B MULTZOA
1. Luzean (Donibane Lohizune, Lapurdi), 4 puntu
2. Kanboarrak (Kanbo, Lapurdi), 3 puntu
3. Txost (Oiartzun, Gipuzkoa), 2 puntu
Beraz, Kanboarrak taldearen aurka lehiatu beharko du Behar Zanak finalerdietan; urriaren 10eko jardunaldian izango da norgehiagoka, Villabonan. Beste finalerdian Luzean eta Zaharrer Segi taldeak izango dira aurrez aurre; larunbat honetan bertan jokatuko dute, Zubietan. Hemen, finalerdien xehetasunak:
Urriak 2, larunbata, 11:00, Zubieta-plaza
LUZEAN vs ZAHARRER SEGI
Urriak 10, igandea, 11:00, Villabona-Errebote plaza
BEHAR ZANA vs KANBOARRAK
Eguraldiak eta egoerak laguntzen badute, irabazleek urriaren 17ko jardunaldian jokatuko dute finala, Oiartzungo Beheko plazan.
Aipatu bezala, Euskal Herriko 6 talde lehiatu dira 58. Enrique Abril Errebote Txapelketan: Behar Zana, Kanboarrak, Luzean, Txost, Zaharrer Segi eta Zubieta.
Lehiaketa-Federatua-Enrique Abril-Errebotea nagusiak atalean kontsulta daiteke txapelketaren inguruko informazio gehiago.
