Bere mendeurrenaren ospakizunetan murgilduta jarraitzen du Gipuzkoako Euskal Pilota Federazioak (GEPF), eta ekimen berezi baten berri eman du oraingoan: euskal pilota jokoaren kartak. Itziar Lete Andonegi GEPFko presidenteak eta Daniel Carballo Ostolaza sortzaileak eman dituzte ekimenaren eta karta-sortaren xehetasun guztiak.

Euskal pilotan oinarritutako karta-sorta osatu du egileak. "Euskal piotaren modalitate guztien ondarea ezagutaraztea eta zabaltzea" izan du helburu Carballok.

Ezagutzen ditugun karten eredua hartu du oinarri horretarako, lau figurekin, eta horrela osatu ditu:

• Urreak: pilotak dira
• Kopak: txapelketak eta sariak
• Ezpatak: xisterak, guanteak, zesta, erremontea...
• Bastoiak: palak, erraketa, xarea...

"Oroigarri polit honekin gure ekarpena egin nahi izan dugu", azaldu du Letek.

Federazioaren egoitzan (Anoeta pasealekua, Kirol Etxea. Donostia) daude eskuragarri karta-sortak, 5 eurotan.