Eskola adineko pilotarientzat topaketa gehiago izango dira, asteburuan (2023-10-22): hain zuzen ere, eskuzko eta paletako topaketa bana.

Urri hasieran infantil kategoriako palistak elkartu ziren, Bidania-Goiatzen; eta orain palista benjaminen eta alebinen txanda izango da: larunbat arratsaldean dute hitzordua, Villabonan.

Bestetik, eskuz aritzen diren benjamin, alebin eta infantil kategorietako neska pilotariek ere beren lehendabiziko topaketa izango dute: Villabonan elkartuko dira hauek ere, igande goizean.

Ondorengo lerroetan dituzue xehetasun gehiago:

PALETA (BENJAMINAK ETA ALEBINAK)

Esan bezala, larunbat arratsaldean dute hitzordua benjamin eta alebin kategorietako palistek, Villabonako Bear Zana pilotalekuan.

16:00etatik 17:15era benjaminek izango dute saioa; 17:15etik 18:30era alebin batzuen txanda izango da (Bidania-Goiatz, Olaberria, Ordizia eta Villabonakoak, hain zuzen ere); eta 18:30etik 19:45era gainontzeko alebinak ariko dira (Azpeitia, Errenteria eta Zumaia).

Bakoitzak bere pala eraman beharko du, baina gainontzeko materiala eta baliabideak federazioak jarriko ditu.

Ez da beharrezkoa izango zuriz jantzita joatea.

ESKUA, EMAKUMEAK (BENJAMINAK, ALEBINAK ETA INFANTILAK)

Nesken lehendabiziko eskuzko topaketa igande goizean izango da, hau ere Villabonako Bear Zana pilotalekuan. Benjamin, alebin eta infantil kategorietako pilotariak daude deituta.

09:30ean hasiko dira saioak, eta ordubetekoak izango dira: 09:30etik 10:30era errendimenduko infantilak ariko dira; 10:30etik 11:30era errendimenduko alebinen txanda izango da; 11:30etik 12:30era parte-hartzeko alebinen saioa izango da; eta 12:30etik 13:30era parte-hartzeko benjaminak bilduko dira.

Hainbat klubetako neska pilotariek eman dute izena, besteak beste: Abantzu, Albiztur, Alde Zaharra, Bergara, Eple, Gaztelupe, Intxurre, Intza, Lapke, Mundarro, Murumendi, Oiarpe, Pagazpe eta Ziotza.

Pilota goxoak erabiliko dira saio guztietan, eta federazioak jarriko ditu.

Ez da txuriz jantzita joan beharko.